گوپی چند نارنگ نے ساختیات اور پس ساختیات کی جو ترجمانی کی ہے اس کی رو سے "زبان میں صرف فرق ہی فرق ہے بغیر اثبات کے"۔ سوسیئر کا اصل قول یہ ہے: In language, there are only differences without positive terms. اس اصول کی جزوی صداقت سے انکار نہیں کیا جا سکتا، لیکن یہ زبان کے نظام کا صرف ایک رخ ہے۔ اس کے بالمقابل ایک دوسرا رخ بھی ہے جس کی تحقیق میں نے خود کی ہے، اور اسے میں یوں بیان کرتا ہوں: یہ نکتہ اپنی تاکید کے ساتھ درست نہیں کہ زبان کی آوازوں میں صرف فرق ہی فرق ہے۔ اشیا یا تصوراتِ اشیا کا اختلاف اس بات کی دلیل نہیں کہ ان میں کوئی مشابہت سرے سے موجود ہی نہیں۔ حقیقت یہ ہے کہ حروفِ تہجی کی آوازوں کی سطح پر حروف تہجی میں بھی اور ان سے مل کر بننے والے الفاظ میں بھی باہمی مشابہتیں پائی جاتی ہیں، اور دراصل اسی مشابہت کی بنیاد پر ان کے مابین فرق کا احساس ممکن ہوتا ہے۔ میرا اصل دعوی یہ ہے کہ زبان کی آوازوں میں تفریقی رشتہ بھی ہے اور اتحادی رشتہ بھی—اور ان میں سے کسی رشتے کو دوسرے پر کوئی تقدّم یا برتری حاصل نہیں۔ نہ یہ کہا جا سکتا ہے کہ کون سا رشتہ پہلے ہے اور کو...
مرزا سلطان احمد کے نظام علوم و فنون کی تفہیم کے لیے ان کی دو بنیادی اصطلاحات کو سمجھنا ناگزیر ہے۔ پہلا ہے منظرِ قدرتیہ اور دوسرا ہے جذباتِ انسانیہ۔ ان دونوں اصطلاحوں کو سمجھنے کے بعد ہی علوم و فنون کی کثرت میں وحدت کا نظارا کیا جا سکتا ہے۔
منظرِقدرتیہ سے مراد وہ تمام تر مناظر – یعنی ہر قسم کی مادی اور غیرمادی موجودات اور ان سے متعلق حالات، کیفیات، تغیرات و تبدلات، تصرفات، واقعات، معلومات وغیرہ ہیں جو انسان کے انفرادی و اجتماعی علم و ادراک میں موجود تھے، ہیں اور آئندہ ہوں گےخواہ انسانی علم میں کسی بھی جہت سے ارتقا ئی یا انحطاطی عمل پایا جاتاہو۔ ظاہر ہے اس میں موجودات کی مادی و غیر مادی ہر نوع کے مجموعی و انفرادی اشکال، ہیئتیں، حالتیں، کیفیتیں اور/ یا تصرفات شامل ہیں۔ مثلاً اس میں جمادات کی ہر نوع سے متعلق ہر قسم کے مناظر کا احاطہ کیا جا سکتا ہے۔ اسی طرح، ا س میں حیوانات کی ایک نوع انسان کے متعلق ہر قسم کے مناظر شامل ہیں یا کیے جا سکتے ہیں۔ واضح رہے کہ اس میں ماورائے انسان مناظر و مظاہر کے سلسلے میں کوئی تبصرہ نہیں کیا جا سکتا کہ وہ اس میں شامل ہیں یا نہیں ہیں۔ بلکہ منظر قدرتیہ کے تحت انسانی شعور اور انسانی ادراک و احساس کے دائرے کے تحت آنے والے مناظر و مظاہر ہی رکھے جا سکتے ہیں اور ان مناظر و مظاہر سے کوئی سروکار نہیں رکھا جا سکتا جو انسان کے لیے بہرصورت ناقابل ادراک و احساس ہیں۔کیونکہ انسان کے لیے ناقابل ادراک مناظر و مظاہر کے عدم اور وجود پر کوئی حکم لگانا ہی ممکن نہیں ہے۔
جذباتِ انسانیہ سے بھی بالکلیہ وہی مراد ہے جو منظر قدرتیہ سے ہے فرق صرف یہ ہے کہ منظر قدرتیہ کی اصطلاح کی مدد سے: موجودات پر انسان کے ذریعے قدرت کے زاویے سے روشنی ڈالی گئی ہے اور اس روشنی میں تمام تر قدرتی مناظر و مظاہر کے ساتھ ساتھ خود انسان اور اس کے جملہ اجتہادات اور کارنامے بھی بحیثیت جدا جدا انواع کے دکھائی دیتے ہیں۔ جبکہ جذباتِ انسانیہ کی اصطلاح کی مدد سے: خود انسانی زاویے سے تمام تر مناظرِ قدرتیہ پر روشنی ڈالی گئی ہے جس میں انسان بحیثیت ایک نوع کے خود اپنے کارناموں کو قدرتی مناظر سے علیحدہ بھی دیکھ سکتا ہے۔
واضح رہے کہ انسانی نقطۂ نظر سے قدرتی مناظر میں وہ تمام تر مناظر شامل ہیں جو وہ مختلف سلسلۂ موجودات میں دیکھتا ہے۔ مثلاً بیا کا گھونسلہ (جو نوعِ حیوانی کے ایک فرد کا کارنامہ ہے) یا پہاڑ (جو جمادات کی ایک شکل ہے) قدرتی مناظر ہیں۔ حالانکہ خود انسان کے اپنے کارنامے بھی وسیع تر مفہوم میں قدرتی نوعیت ہی رکھتے ہیں لیکن بحیثیت ایک نوع کے اپنے کارناموں کو دیگر انواعِ موجودات کے کارناموں سے علیحدہ کرنا بھی ضروری ہے۔ اس لیے وہ دیگر قدرتی مناظر اور اپنے کارناموں یا اجتہادات میں فرق کرتا ہے۔منظر قدرتیہ اور جذبات انسانیہ کو ہم روشنی کی مثال سے سمجھ سکتے ہیں جو نہ صرف یہ کہ گرد و پیش کی اشیا کا مشاہدہ کراتی ہے بلکہ خود اپنے آپ کو بھی دکھاتی ہے۔
پس، مرزا صاحب کے نزدیک قدرت کا ایک وسیع تر مفہوم ہے جس میں موجودات کا ہر سلسلہ، ہر نوع اور اس کی شکلیں، ہیئتیں اور/ یا تصرفات شامل ہیں۔ وہ خود بھی قدرت کا ایک حصہ ہے اور جب بات دیگر انواعِ موجودات کے مناظرسے خود اپنے مناظر کو علیحدہ کرنے کی ہوتی ہے تو اس کے لیے قدرتی مناظر اور انسانی اجتہادات کی اصطلاحیں استعمال کی جا سکتی ہیں۔
یہاں سمجھنے کی بات یہ ہے کہ منظر قدرتیہ اور جذبات انسانیہ دونوں جملہ مظاہر ہست ونیست کو اس کی وحدت میں دیکھنے کے محض دو زاویے ہیں جنہیں مظاہر ہست و نیست کے مطالعہ کی غرض سے نہایت واقعیت کے ساتھ قائم کیا گیا ہے۔
جس قدر مظاہر سے انسان کا سامنا ہوتا ہے اگر وہ اس کو دو حصوں میں تقسیم کرے، یعنی ایک حصہ وہ جس میں بے شمار سلسلۂ انواعِ موجودات کے اندر وہ خود ایک نوع ہے اور دیگر انواعِ موجودات پر یا تو اثر انداز ہوتا ہے یا ان کے متعلق علم حاصل کرتا ہے۔ اس حصے کا ادراک انسان قدرت (یا فطرت) کے زاویے سے کرتا ہے۔ اور اپنے آپ کو قدرت کی جگہ پر رکھ کر جملہ مظاہر کا تماشا کرتا ہے (جتنا کہ کرنا ممکن ہے)۔ یہ منظر قدرتیہ میں شامل ہے۔
اور دوسرا حصہ وہ جس میں انسان یہ سمجھتا ہے کہ مظاہر کا جس قدر علم اس کو ہو رہا ہے وہ اسے اپنے اجتہادات کے ماتحت لائے یا نہ لائے، یعنی وہ اس علم کو پا کر فطرت یا قدرتی عمل میں تصرف کرے یا نہ کرے یہ بہرحال اس کی اپنی نظر ہے جو اس کو مظاہر کا تماشا دکھا رہی ہے۔ یہ جذبات انسانیہ میں شامل ہے۔
یعنی منظر قدرتیہ جذبات انسانیہ ہے اور جذبات انسانیہ منظر قدرتیہ ہے۔ یہ دونوں ایک ہی سلسلۂ مناظر ومظاہر کے تماشے پر مبنی دو نام ہیں۔ اور اسے دو علیحدہ ناموں سے پکارنے کا مقصد یہ ہے کہ ایک طرف تمام تر مظاہر ہست و نیست کو بحیثیت مجموعی انسانی نظر سے جس قدر بلند ہو کر دیکھنا ممکن ہو دیکھا جائے اور دوسری طرف انسان اور اس کا علم اور کارنامے حتی الامکان دیگر انواعِ موجودات سے متمیز ہو جائیں۔
جس چیز کو انسان قدرت یا فطرت (نیچر) کہتا ہے وہ انسانی نظر اور انسانی علم کی رو سے ہی انسان پر ظاہر ہوتی ہے، اور آزادانہ وہ اپنے کو انسان پر ظاہر نہیں کر سکتی۔ انسان خوب سمجھتا ہے کہ قدرت یا نیچر کی یہ اصطلاح خود اس کی وضع کردہ ہے ورنہ خود نیچر میں یہ اصطلاح اپنے تصورِ کے ساتھ انسان سے خارج کسی اور ہستی میں انسان کے نزدیک ثابت نہیں۔ پس، نیچر کا جو تصور انسان کے ذہن میں کارفرما ہے وہ خود انسان کا اپنا زائیدہ تصور ہے اور اس لیے یہ ایک انسانی تصور ہے اوراس نسبت سے نیچر کا یہ تصور ’’جذبات انسانیہ‘‘ کے ماتحت رکھا جا سکتا ہے۔ لیکن چونکہ انسان بحیثیت ایک نوع کے دیکھتا ہے کہ اس کائنات میں صرف وہی کارفرما و متصرف نہیں بلکہ دیگر انواع موجودات بھی اپنے اپنے حیطہ وجود میں کارفرما و متصرف پائے جاتے ہیں، پس انسان اور دیگر سب انواعِ موجودات جن قوانین کے ماتحت پائے جاتے ہیں انہیں ایک نام قدرت یا نیچر کا دینا ضروری ہے۔ اور اس لحاظ سے انسان اور دیگر انواع موجودات کے اپنے اپنے حیطہ وجود؍حیطۂ عمل میں پائے جانے کے مناظر کو منظر قدرتیہ کے طور پر سمجھا جا سکتا ہے۔
غرض ہم دیکھ سکتے ہیں کہ منظر قدرتیہ اور جذبات انسانیہ کے تصورات میں ایک وحدت ہے جس کو فرضی طور پر منقسم کر کے دیکھا جا سکتا ہے لیکن اس کو بالکلیہ ایک دوسرے سے منفک نہیں کیا جا سکتا۔ مظاہر ہست و نیست میں منظر قدرتیہ اور جذبات انسانیہ کی وحدت کا یہ تماشا ذہنی سطح پر وحدت وجود کی طرف اشارہ کرتا ہے (خواہ وہ تماشا بالذات کوئی وحدت ہو یا نہ ہو)۔ (اس سیکشن میں میں نے جو کچھ درج کیا ہے وہ مرزا صاحب کی تحریروں کے مطالعے کی بنا پر کیا گیا میرا ایسا قیاس ہے جس کے اکثر نکات پر میں کوئی براہ راست حوالہ پیش نہیں کر سکتا۔ ہو سکتا ہے اس میں میرے ذاتی خیالات کی آمیزش ہو گئی ہو۔)
تبصرے
ایک تبصرہ شائع کریں
تبصرہ کریں